Shop till U drop

Í dag er ár liðið frá því við fluttum hingað á Myggenæsgade 7. Það var bókstaflega eins og koma í himnaríki miðað við Öresundskollegið sem var hreinasta helv... en þar bjuggum við í 1 og hálfan mánuð. Það er óskaplega ljúft að búa hér á Íslandsbryggju, stutt í allar áttir. Það sem mér finnst líka gott er að við finnum ekkert fyrir þvi að búa í stórborg hérna inni í götunni okkar, enda er þetta alveg lokað hverfi. Já þetta er ljúfur staður.

Dagurinn var sko aldeilis fínn. Náði að kaupa 4 og hálfa jólagjöf og er ánægð með það. Gott að vera aðeins komin af stað. Hitti svo eina mömmuna þegar ég sótti Ingibjörgu og sagði henni að ég hefði verið í Fields að versla jólagjafir. Hún starði á mig eins og ég væri eitthvað verri... já þú ert svolítið snemma í því Gat ekki annað en brosað. Við Hlín tókum svo pásu eftir H&M og fengum okkur gott að borða og tókum svo restina af Fields í nefið. Ægilega gaman hjá okkur. Ætlum að endurtaka þetta í nóvember og taka þá stefnuna í hliðargöturnar af Strikinu. Þær eru jú æðislegar.

Keypti Milka súkkulaðidagatal handa Ingibjörgu. Gott súkkulaði og það er reglulega falleg mynd á dagatalinu. Náði líka nokkrum skó gjöfum og meðal annars þeirri sem hún á að fá á aðfangadagsmorgun. Svo þarf auðvitað að spá í gjöf sem jólasveinninn kemur sjálfur með. Spurning að það verði einhver íslensk jólasveinabók? Það gæti verið skemmtilegt  

En ég er þreytt eftir búðarápið og ætla upp í rúm að sofa. Guten nacht! 

Gullkorn dagsins:

Rósum rignir aldrei af himnum ofan. Ef þú vilt fleiri rósir en til eru verður þú að gróðursetja fleiri rósarunna.

Georgía Eliot

Jólagjafir og skólinn

Ég er að fara í Fields í fyrramálið og ætla að dvelja þar allan daginn! Ójá að kaupa jólagjafir Við Hlín, en hún er með mér í skólanum og býr í Holte, ætlum að spóka okkur um. Ætli mesti tíminn fari ekki í H&M og Toys'r us, finnst það líklegt. Var að hugsa um að reyna að klára skó gjafirnar handa Ingibjörgu líka. Hlakka mikið til.

Við Áslaug erum búnar að fá einkunn fyrir rannsóknarritgerðina okkar. Fengum 9! Erum afar ánægðar Svo fékk ég 9,4 fyrir fína hugarkortið mitt. Er ægilega glöð með það líka. Vildi að þessir áfangar væru próflausir, að það væru bara verkefnaskil. Mikið væri það ljúft. Kvíði all svakalega fyrir prófunum og þá sérstaklega þroska- og námssálarfræðinni. En eins og ég er búin að segja oft og mörgum sinnum, ef ég fell þá tek ég bara prófið aftur í ágúst. 

Við áttum að velja okkur kjörsvið í síðustu staðlotu í skólanum. Finnst það frekar snemmt þar sem maður er rétt að átta sig á hvernig skólinn virkar og annað í þeim dúr. Það var ýmislegt sem að heillaði mig, t.d. íslenska, samfélagsgreinar og almenn grunnskólakennsla. Ég skoðaði þetta svo auðvitað allt vel og vandlega. Varð fyrir vonbrigðum með íslenskuna því ég var að spá í henni sem kjörsvið, en svo held ég bara að það séu margir leiðinlegir áfangar innan hennar. Fannst það svona þegar ég kynnti mér það betur. Nú og svo er helv... stærðfræðin í almennri grunnskólakennslu sem stoppaði mig. Hugsið ykkur, ég er orðin þrítug og enn hræðist ég stærðfræði! En ég ákvað að velja það sem ég hef áhuga á og hef gaman af, svo ég valdi samfélagsgreinarnar. Þar inni er svo 4 í boði og vel ég 2. T.d. sögu og kristnifræði. Kosturinn við samfélagsgreinarnar er að þar er mikið val og þá get ég t.d. valið íslensku áfanga og dönsku og annað sem mér finnst áhugavert. Þetta er það sem heillar mig núna, en svo má auðvitað skipta um kjörsvið ef þetta er engan veginn það sem maður vill. 

Jæja ég er farin upp í rúm. 

Gullkorn dagsins:

Hrokafull hálfmenntun er einn versti óvinur vits og hugsunar.

Sigurbjörn Einarsson

XPS M1330

Jæja þá er búið að panta tölvuna. Og fyrir valinu varð XPS M1330, rauð. Fengum svo meldingu um að hún væri væntanleg hingað til okkar 14. nóvember. Það er nú mun styttri tími en við bjuggumst við, við erum jú í Danmörku þar sem allt gerist á hraða snigilsins. Þannig að nú er bara hægt að láta sig hlakka til Það reyndar kom upp úr krafsinu að það er ekki hægt að fá tölvuna með ensku stýrikerfi svo ég fæ gripinn á dönsku! Ætlum að sjá hvernig það gengur, annars bara að kaupa nýtt stýrikerfi.

Það var verið að byrja að sýna fyrsta þáttinn í seríu 3 af Prison Break í kvöld. Við skötuhjú sátum alveg negld niður fyrir framan imbann. Þvílík spenna! Guð á himnum. Þetta endar alltaf svo spennandi að það er varla séns að bíða eftir næsta mánudegi. Svo var Brothers and sisters aftur að byrja. Hlakka til að fylgjast með þeim aftur.  

Á náttborðinu bíður mín Slóð fiðrildanna eftir Ólaf Jóhann. Kláraði Skíðaferðina um helgina og er alveg lost! Veit svei mér þá ekki hvernig bókin endaði. Mjög skrítið. Er reyndar búin að senda mail á Þóreyju til að vita hvernig hún túlkaði þessa bók. 

Gullkorn dagsins:

Þó að það geti verið dapurleg sjón að sjá myndarlegt fólk í hrörlegum hreysum er hitt enn ömurlegra að sjá menningarsnautt og ljótt fólk í glæstum sölum. Það er raunalegt þegar húsakynnin bera langt af fólkinu.

Þórarinn Björnsson skólameistari

Ef þú ert kennari...

Þetta fékk ég sent frá einni sem er með mér í skólanum. Verð að deila þessu með ykkur því mér finnst þetta hryllilega fyndið!! Ég meina, sjái þið þetta fyrir ykkur ef maður myndi framkvæma eitthvað af þessu? Jesús góður!

-Talaðu alltaf lægra og lægra en svo í lokin, bentu á einn nemandann og öskraðu : "HVAÐ VAR ÉG AÐ SEGJA!!!??"

-Kenndu með fingrabrúðum

-Veldu af handahófi einhvern nemanda, spurðu svo ýmsar spurningar og taktu tíman meðan hann svarar... fussaðu svo og sveiaðu þegar hann svarar

-Segðu nemendunum að kalla þig "Ljómalind" eða "Pétur Pan"

-Stoppaðu í miðri kennslu allt í einu, grettu þig og spurðu nemendurna hvort þú sért með feitann rass

-Vertu með speglagleraugu og talaðu bara tyrknesku... láttu sem þú heyrir ekki í nemendum

-Byrjaðu kennsluna á að syngja og dansa "Sex Machine" eftir James Brown

-Leggðu nemendum fyrir það heimaverkefni að lesa frá Jóhannesi til Njarðar í símaskránni fyrir næsta tíma... og taktu fram að það verði próf

-Láttu alltaf tvo nemendur dreifa rósarblöðum á undan þér þegar þú labbar um stofuna

-Biddu nemanda aðeins um aðstoð upp við töflu... láttu þá skrifa undir samning meðan þú græjar á þig stálbrynju og stingur slípirokknum í samband.

-Byrjaðu kennsluna á því að brjóta tappann af vodkaflösku og öskra: "TÍMINN ER BÚINN, ÞEGAR FLASKAN ER BÚIN!"

-Láttu eins og kennslustofan sé full af vatni og syntu um allt!

-Urraðu á nemendurna og kallaðu þá alltaf "háseta"

-Komdu með lítinn hvolp í tíma... alltaf þegar einhver spyr þig spurningar, þá ferð þú og spyrð hvolpinn

 -Vertu í bleikum kjól, með englavængjum og biddu alla að kalla þig "Krúselíus!"

 -Hnerraðu framan í nemendurna

-Komdu hlaupandi inní kennslustofuna, froðufellandi og öskraðu ! "ERU ÞIÐ Í STUÐI!!!???? ÉG HEYRI EKKI Í YKKUR!!! ERUÐI Í STUÐI!!??!??!

 Annars er bara mígandi rigning hér í dag. Það er þá hægt að bóka það að Ingibjörg fari ekkert út í dag!! Meiri vitleysan! Ég er að reyna að koma mér í lærdómsgírinn og er að bíða eftir að stytti upp til að skjótast út í búð.

Hafið það gott í dag. 

Rólegheit

Þá er búið að breyta klukkunni og er nú bara einn tími á milli Íslands og Danmerkur. Eins furðulegt og það nú er að þá finnst mér ég nær fólkinu heima en þegar það eru tveir tímar á milli. Ég veit, skrítið

Enn ein ljúf helgin að baki. Dagurinn í dag er búinn að vera sérstaklega letilegur. Kannski vegna tímabreytinga Vöknuðum í seinna fallinu, röltum niður á Íslandsbryggju á leikvöllinn þar, komum heim og borðuðum, enduðum svo öll upp í rúmi og sváfum í tvo hálfan klukkutíma! Svo var grillað hreindýr og haft það náðugt í allt kvöld. Ógurlega ljúft líf. Í gær komu Hrafnhildur og fjölskylda í lummukaffi. Mjög gaman og voru þau hjá okkur fram eftir kvöldi.  

Það er sko bara búið að vera hífandi rok í dag. Mér finnst ég ekki hafa upplifað svona "rok" hérna áður. Oft verið einhver gola/vindur enn ekki svona hvasst. Fannst bara eins og ég væri á Austurströndinni úti á Seltjarnarnesi. En það var nú bara góð tilfinning. Rokið aftraði þó ekki feðginunum að fara út að grilla. Það var bara að græja sig rétt og skella sér svo út með nokkur teppi

Annars eru þau sofnuð og ég sit hér enn. Sagði við Heimi að ég ætlaði að kíkja aðeins á skólann. Einmitt, sit núna að blogga! 

Gullkorn dagsins:

Steinn, sem liggur kyrr, drepur grasið undir sér.

Maxim Gorki

Dansi dansi

Föstudagskvöldin eru alveg heilög hér á bæ. Fyrst fær Ingibjörg að horfa á klukkutíma Disney show á DR1 og svo tekur við Vild med Dans fyrir okkur mæðgurnar. Þetta eru æðislegir þættir hreint út sagt! Handboltagaurinn minn og hans dama eru dottin út svo nú eru það Robert og Marianne sem eru mitt par sko! Held mikið upp á þau og vona að þau vinni þetta. Fannst þau rosalega flott í kvöld.  Hún er náttúrulega algjört ÆÐI og hann er svo ótrúlega mikil dúlla, en jafnframt alveg helv... flottur!! Er hinsvegar með æluna í hálsinum yfir Lai og Mie Finnst þau svoooo glötuð. Er líka hrifin af Vicki og Steen, þau eru bæði svo yndisleg og fengu einmitt í kvöld fullt hús stiga (40 stig) í fyrsta skipti í þáttunum. Þau eru flott.

Annars er ég svona nokkurn veginn búin að ákveða mig með tölvumálin. Held að það vitlegasta í stöðunni sé að taka "krækiberið" eins og Sigurlaug orðaði það Eins og Heimir segir að þá erum við að fá þvílíka gripinn fyrir ekki mikinn pening. En svona ykkur að segja munar meira en 50.000 kr á þessari tegund hér og heima. Já það er ekki bara kjúklingurinn sem er ódýrari hér í Danaveldinu

Róleg helgi framundan, ekkert planað annað en að Hrafnhildur og co koma á morgun í lummukaffi, það verður gaman. Hafið það gott um helgina kæru vinir.

Gullkorn dagsins:

Heilbrigð skynsemi er í rauninni ekki annað en botnfallnir hleypidómar sem minni vort og sálarlíf hafa innbyrt fyrir 18 ára aldur. Hver ný hugmynd, sem fyrir manni verður síðar í lífinu, verður að stríða við þetta hrúgald af skoðunum sem menn telja sjálfsagðar.

Albert Einstein

Meira um tölvur

Nú er ég alveg orðin rugluð í þessum tölvumálum. Almáttugur... Heimir er búinn að skoða málin og segir að nú þurfi ég bara að velja! Ég fæ stundum valkvíðaköst og nú er ég stödd í einu slíku. Valið stendur á milli Dell Inspiron eða Dell XPS M1330! Það sem ég vil og svo það sem hann vill. Við ætlum að panta tölvuna hérna úti í Danmörku því verðmunurinn er gífurlegur... og þá meina ég GÍFURLEGUR. Það sem er að trufla mig í sambandi við að kaupa Inspiron hérna er að þá er danskt stýrikerfi á tölvunni. Og bara ekki hægt að fá annað. Það sem mér finnst miður með XPS tölvuna er að það er svo lítill skjárinn á henni, eða 13 tommu. Ég vil helst ekki minni en 15 tommu og það fengi ég á Inspiron. En svo er auðvitað annað mál að ég myndi læra á danska stýrikerfið eins og allt annað, en mér finnst samt leiðinlegt að hafa það danskt! Og auðvitað myndi ég venjast minni skjá. Þá hafi þið það! Getur einhver aðstoðað mig? 

Hef þetta ekki lengra í bili... hugsa ekki um annað en þessar tvær tölvur í augnablikinu og á sjálfsagt eftir að dreyma þær í nótt, svei mér þá! 

Gullkorn dagsins:

Menn skyldu varast að halda að þeir viti nú alla skapaða hluti þó þeir hafi lesið eitthvert slángur af bókum því sannleikurinn er ekki í bókum, og ekki einu sinni í góðum bókum, heldur í mönnum sem hafa gott hjartarlag.

Halldór Laxnes

Tölvur og dagatöl

Mér heyrist á öllu að ég sé loksins að fá nýja tölvu!! Jájá og nú get ég ekki beðið!! Heimir hélt að hann þyrfti ekki að hafa tölvuna með sér í skólann, en nú er það að breytast. YES! Og nú er bara spurning hvað hann velur handa mér. Það verður auðvitað Dell, og mig langar í Inspiron - HVÍTA! Hann er hinsvegar eitthvað að vesenast með D630 held ég. Hann segir að þær séu betri en hinar, en mig langar ekkert í svoleiðis, þær eru bara gráar alveg eins og þessi sem við eigum. Svo langar mig í tölvu með stórum skjá, hann vill hinsvegar lítinn. Held ég fái samt ekki stærri en 15 tommu. Það verður gaman að vita hvað kemur úr þessu  

Pyrus jóladagatalið er komið í hús, 1. des mætti því koma á morgun Keypti ekki Disney dagatalið því það sem ég vildi var ekki með súkkulaði, bara einhverjum Jelly Beans. Langar ekki að gefa henni svoleiðis. En það var til eins Disney súkkulaði dagatal og hún fékk í fyrra. Það er með Pooh og félögum. Hitt er bara svo ferlega flott, með Mikka mús og co. Spurning um að kaupa bæði og flytja súkkulaðið yfir í Mikka mús. Já það er hugmynd.

Annars virðist kúlan ekki vera köngulóarbæli. Sýnist á öllu að þetta sé bara bóla. Varð fyrir svolitlum vonbrigðum, þar sem ég var búin að ákveða að taka upp á video þegar þær myndu brjótast út og sýna ykkur. En það gerist kannski seinna. 

Gullkorn dagsins:

Í velgengni geta rætur ósigurs leynst og í ósigri rætur velgengni.

Karl de Gaulle

Jóla - jóla - jóla

Já aðeins 2 mánuðir í Þorláksmessu! Og þessir mánuðir eiga eftir að líða OFUR fljótt skal ég ykkur segja. Ég kom við í Super Brugsen þegar ég var búin að fara með Ingibjörgu á leikskólann, þar voru þeir í óða önn að raða upp jólavörunum!! Ég virtist falla í trans þarna í smá stund og rankaði við mér þar sem ég stóð með sólheimaglott fyrir framan hillurnar! Jólasælgæti, jólaseríur, jólaskraut, jólaservéttur, jóla, jóla, jóla. Ætla að fara þangað á morgun í jólaleiðangur. Ætla að kaupa súkkulaði dagatal frá Disney handa Ingibjörgu og svo er ég að hugsa um að kaupa Pyrus sjónvarpsdagatalið. Veit reyndar ekkert hvort daman eigi eftir að fíla þessa þætti en það kemur í ljós. Ég get þá kannski skemmt mér yfir þessu um leið og ég kíki í dagatalið Jeminn einasti hvað ég hlakka til!!

Eitthvað eru Danirnir nú aftarlega á merinni í Greys Anatomy. Izzie og George sváfu saman í síðasta þætti... alveg sko! Svo er ég nú á norsku 2, hélt þeir væru kannski komnir lengra. Neinei, þeir eru að sýna þáttinn þegar pabbi George deyr! Svei mér þá! Ég sem er búin að sjá fyrstu tvo þættina í nýju seríunni og er ekki alveg að geta beðið í svona langaaaannn tíma. Arghhh! Ætli ég endi ekki með að fá Hermann bara til að brenna fyrir mig á disk sem ég tek svo með mér um jólin. Hermann, er það ekki? Það yrði veisla!

Í dag uppgötvaði ég kúlu hægra megin á enninu, alveg upp við hársrótina. Ef ég ýti á hana þá er þetta sama tilfinning eins og um mar sé að ræða. Ég hef samt ekkert dottið eða rekið mig í. Það  sem ég ímyndað mér þá að þetta sé, er að könguló hafi verpt þarna og eftir viku skríða litlar köngulær þarna út. Ég er alveg sjúklega hrædd við köngulær, þannig að þetta kæmi afar illa við mig. En kannski er þetta bara bóla! Nei örugglega köngulóarbæli. Ég hef samt með árunum náð að vinna í þessari fælni minni þannig að ég get verið nálægt þeim. Eða þannig... ef ég sé svona kvikindi á gólfinu, næ ég í glas og skutla því yfir það og býð svo eftir að einhver komi til að taka hana. Þetta gat ég ekki fyrir ca. 15 árum. Einu sinni þurfti ég meira að segja að sækja mér hjálp til nágrannana þegar ég var ein heima. Þá var ein skríðandi á vegg inni í stofu. Man ekki hvor það var Jón Gunnar eða Palli sem kom mér til bjargar þá. Gott að eiga góða granna!   

Gullkorn dagsins:

Menn drekka úr öllum pyttum ef þeir vita ekki hvar uppsprettan er.

Álfur Larsen

Hitt og þetta

Ég er búin með Ólaf Jóhann, Höll minninganna. Kláraði hana í nótt, gat ekki lagt hana frá mér svo ég var að lesa til 3. Þvílíkt góð bók! Skældi tvisvar yfir henni. Nú er ég byrjuð á Skíðaferðinni sem ég keypti mér á vellinum síðast. Líst nú bara þokkalega á hana, en mér líður ekki vel að lesa hana. Vorkenni stráknum frekar mikið. Næst á dagskránni er svo Slóð fiðrildanna eftir Ólaf. Var að spá í að lesa hana núna, en ákvað svo að kannski væri of mikið að lesa 3 bækur eftir hann í röð. En ég bíð spennt eftir að byrja á henni.

Annars áttum við mjög rólega helgi. Á sunnudeginum lágum við mæðgur uppí rúmi til hádegis að lesa. Ægilega notalegt.

Eldaði lasagna í kvöld. Best að taka það fram að ég hef aldrei búið til lasagna. Mér hefur samt alltaf fundist þetta gott, en einhverra hluta vegna ekki gert þetta. Þegar ég var í Vogunum eldaði Júlía Rós eitt kvöldið lasanga og ég ákvað að fylgjast með frá grunni. Er svo búin að gera þetta tvisvar síðan ég kom heim. Ægilega gott. Í fyrra skiptið notaði ég nautahakk en í kvöld ákvað ég að nota hreindýrahakkið sem við eigum jú nóg af! Eins og mér þykir nú hreindýrakjöt ljúffengt að þá get ég ekki sagt það sama um hakkið! Finn alltof mikið bragð af því... vont kjöt bragð. Ég er reyndar afar skeptísk á hakk yfir höfuð. Borða t.d. ekki hamborgara og mjög sjaldan nauta hakk. Missi alltaf matarlystina ef ég fæ svona brjósksinaógeð uppí mig. Þetta sem maður getur nuddað á milli tannanna... ojjbarasta!! En héðan í frá mun ég nota nautahakk í lasagnað mitt! Langar svolítið að prófa bara grænmeti... á einhver uppskrift af góðu grænmetislasagna handa mér?

Gleymdi að segja ykkur að það er búið að stela hjólinu hans Heimis! Ömurlegt! Við uppgötvuðum það síðasta mánudag, en því var sennilega stolið þá helgi. Ferlegt. Ég var nýbúin að tala um að við værum búin að búa hér í ár og ekki enn búið að stela af okkur hjóli. Hefði betur átt að þegja. Ég færi örugglega að skæla ef mínu hjóli yrði stolið. Á það nefnilega til að bindast dauðum hlutum sterkum böndum og persónugera þá, svo sem bílana sem ég hef átt. Erum að bíða eftir að heyra frá tryggingarfélaginu hvað kemur út úr þessu, og svo er bara að fara á stúfana og kaupa hjól.

Próftaflan er komin á hreint. Fer í próf 7. 13. og svo 19. des. Finnst fínt að hafa ágætann tíma á milli prófanna, en finnst samt leiðinlegt að vera búin svona seint. En það er ekki á allt kosið. Ég tek fyrstu tvö hérna úti, og svo síðasta heima í Verkmenntaskólanum. Get nú ekki ímyndað mér að ég eigi eftir að læra mikið undir það próf. Verð þá komin heim, jólin alvega að koma og sjálfsagt nóg um annað að hugsa en prófið. En ef ég fell þá tek ég það bara upp aftur í ágúst, ekki málið!

Hringdi og pantaði jólaklippinguna handa fjölskyldunni. Feðginin fara 18. des og ég fer svo 20. Þá búin í prófunum. Get ekki ímyndað mér hvernig ég verð þá orðin útlítandi, en þá verða akkúrat 4 mánuðir síðan síðast. Ojoj, held ég verði bara að halda mig að mestu inni og þá með húfu ef ég fer út. 

Jæja ætla upp í rúm að lesa, góða nótt.

Gullkorn dagsins:

Sá sem horfir til stjarnanna snýr sér ekki undan.

Leonardo da Vinci