Jamm segjum þetta því gott í bili og ég þakka ykkur, mínum dyggu lesendum  fyrir mín 6 ár í bloggheiminum. Hafið það gott.

Auf Wiedersehen.

Þar sem ég er frekar framlág er ég að hugsa um að koma mér bara snemma í bælið - svona einu sinni! Ég kláraði Auðnina um daginn og varð ekki fyrir vonbrigðum. Núna ætla ég að klára Áður en ég dey, en ég er hálfnuð með hana og skella mér svo á Arnald.

Það er hvorki hættulegt né skammarlegt að detta - en að liggja kyrr er hvort tveggja.

Konráð Adenauer

Við skötuhjú ætlum að skella okkur á þorrablót um helgina. Hlakka mikið til að gúffa í mig öllum þessum guðdómlega mat. Fyrsta skipti sem ég fer á sveitablót. Rosalega langt síðan ég fór á blót, man hreinlega ekki hvað er langt síðan ég fór síðast á allaballablót. Þau eru alltaf svo skemmtileg, annállinn sniiiiiild. Held ég fari ekki á það núna, fer bara næsta ár.

Veit svo sem ekki hverju ég á að ljúga í ykkur. Ætla upp í rúm að lesa Yrsu - ég veit ég er enn að lesa hana. Á nú samt ekki nema 50 bls eftir eða svo, svo þetta hlýtur að takast hjá mér  Næstur í röðinni er svo hann Arnaldur karlinn.

- Hvar sem mest var þörf á þér, þar var best að vera.

Stephan G. Stephansson.

Annars er þessi elska 6 mánaða í dag og er orðinn 9,5 kg og 72 cm. Fékk fína skoðun hjá doksanum og svo rétt rumdi í honum við sprautuna. Er með það á hreinu að þetta verður hörkutól - rétt eins og móðirin *hóst*  

Og ekki nóg með að í dag hafi verið fyrsti grauturinn, heldur fór ég líka og sótti um fyrir hann á leikskólanum! Ó já - today is the day

Fyrsta skeiðin - allir lifa sig vel inn í þetta

Og þá var komið að Ingibjörgu að gefa bróður sínum. Og jájá ég enn með opinn munninn

 "Svona drífið nú í þessu!!"

Nammi nammi namm - litli grautastrákur

Vona að ykkur hafa þótt þetta jafn skemmtilegar myndir og mér  Eigi þið góða helgi. 

- Eitt bros getur dimmu í dagsljós breytt.

Einar Benediktsson

Skoðun og sprauta hjá prinsinum á morgun. Mikil spenna í gangi eins og alltaf, að sjá kílóafjöldann. Held hann sé nú ekki kominn í tveggja stafa töluna ennþá, en er örugglega ekkert langt frá henni  Nú og svo er það grauturinn annað kvöld og Ingibjörg stendur enn föst á því að við eigum að vera í kjólum!

Læt fylgja hér eina mynd af Ingibjörgu úr myndatökunni hjá Siggu Þrúðu. Mér finnst þetta falleg mynd - hún er eitthvað svo dreymin þarna.

- Þú getur ekki hindrað fugla sorgarinnar í að fljúga yfir höfði þínu. En þú getur komið í veg fyrir að þeir geri sér hreiður í hári þínu.

Kínverskur málsháttur.

Heimir er kominn heim - á Austurlandið - ekki heim-heim, en það fer nú að styttast í hann hugsa ég.

Jæja ég ætla að fara að prjóna og horfa á tv.

Lát mig deyja þegar stundin er komin. - Ég óska þess eins að þeir sem þekktu mig best segi um mig að ég hafi ætíð slitið upp þyrni og gróðursett blóm þar sem ég hélt að blóm gætu vaxið.

Abraham Lincoln.

Veit svo sem ekki hverju ég get logið að ykkur... er svona að reyna að koma mér í skólagírinn, finnst það svolítið erfitt eftir gott frí. Finnst líka erfitt að ætla að fara á fætur um 9 eða svo. Get það bara eiginlega ekki, svo við Ármann Snær lúllum okkur bara þar til við vöknum

- Gerðu eitthvað gott - nágranni þinn fréttir það aldrei. Gerðu eitthvað illt - það mun verða alræmt.

Kínverskur málsháttur.

Set hér inn eina mynd af okkur Leó. Þetta er semsagt að kvöldi "aðgerðardagsins", hann náði að skríða upp í fangið á mömmu sinni  þar sem honum finnst jú best að vera.

Deyr fé,

deyja frændur,

deyr sjálfur hið sama;

en orðstír

deyr aldregi

hveim er sér góðan getur.

Hávamál.

Ingibjörg gistir hjá ömmu sinni og skemmtir sér vel. Svo sem ekkert skrítið, þar sem allt annað er sett á hold þegar hún er hjá þeim og öll athygli beinist að henni. Endalaust leikið og bara skemmtilegt  

Er að fara að byrja á spennandi prjónaverkefni á sjálfa mig, aldrei þessu vant. Fékk garnið í dag en þá voru ekki til prjónarnir!! Mikið er svekkjandi að geta ekki byrjað. Horfi bara á garnið og það á móti... ohhh

Langar rooosalega að lesa ævisögu Eric Claptons - á hana einhver?

Í hendi Guðs er hver ein tíð,

í hendi Guðs er allt vort stríð,

hið minnsta happ, hið mesta fár,

hið mikla djúp, hið litla tár.

Matthías Jochumsson

Komin helgi og Heimir er að vinna alla helgina - skemmtilegt  

Er farin upp í rúm að lesa.

... hjörtum mannanna svipar saman í Súdan og Grímsnesinu.

Tómas Guðmundsson

Eitt svona í lokin... ætla að benda ykkur á að þegar ég hef ekki bloggað í X langan tíma, þá commenta hinir og þessir um að ég verði nú að fara að blogga. Einnig er ég spurð út í búð hvað sé eiginlega í gangi með mig, hvort ég sé bara hætt og fleira í þeim dúr. Nú hef ég bloggað 6 daga af þessum 8 dögum sem liðnir eru af árinu og enn hefur ekki eitt comment komið frá þessum manneskjum! Tussist (í boði Þóreyjar) nú til að kvitta!! Say no more... en takið það til sín sem eiga það

- Eitt kærleiksorð getur sálir til himins borið.

Davíð Stefánsson frá Fagraskógi

Fór að hugsa um þvottamál í dag þegar ég var að brjóta saman þvott og beið eftir að vélin kláraði sig. Sumir hafa einn þvottadag í viku en aðrir þvo bara jafnóðum. Ég er svona meira í þeim gírnum, þvæ 1-2 vélar á dag og einstaka sinnum tek ég einn dag frí. Man þegar ég var ein og bjó á Austurströndinni... þá þvoði ég tvær vélar ca. einu sinni í viku, ef það náði því þá, stundum voru þetta tvær vélar á tveggja vikna fresti! Alveg finnst mér það nú magnað og fyndið að hugsa til þess svona miðað við hvernig staðan er í dag  Verst hvað mér finnst leiðinlegt að brjóta saman þvottinn og ganga frá honum... finnst nefnilega mjög gaman að setja í vélina og hengja upp.

Já þetta eru svona pælingar dagsins hjá mér

- Við erum öll landkönnuðir í lífinu - hvaða leið sem við höldum.

Friðþjófur Nansen

Þeim fjölgar "bréfunum" sem maður fær, það er svolítið sniðugt. Gera svona stuttan annál þar sem stiklað er á stóru hvað á daga fjölskyldunnar hefur drifið síðastliðið ár. Hugsa að ég eigi einhvern tímann eftir að gera þetta, svona þegar börnin eru farin að gera eitthvað meira en að vera í leikskóla og á brjósti

Ég gæti hinsvegar bilast yfir glimmerinu sem stundum er í jólakortum! Hvað er málið? Þetta er ekki fallegt! Ég þvoði mér um hendurnar þegar ég var búin að fara yfir bunkann, en þegar ég leit svo í spegil og sá glitra í andlitinu á mér, fór ég í sturtu. Ekki skánaði það þegar úr sturtunni kom og ég sá glimmer í sófanum! Það var því lítið annað að gera en að ná í ryksuguna. Þetta er svo mikill viðbjóður að það er engu lagi líkt, þetta er allstaðar! Ég hef reyndar orðið varann á mér þegar ég opna jólakortin, opna umslagið og kíki ofan í hvort líklegt sé að það sé glimmer á kortinu. Ef svo er næ ég í einnota hanska og opna kortið yfir vaskinum. Já það er ekkert grín að vera með glimmer fóbíu.

Heimir er enn í vinnunni og börnin auðvitað sofnuð. Þetta þýðir það að ég fer ekki upp í rúm til að lesa Yrsu. Ég bara get ekki lesið hana þegar ég er "ein" heima. Það er þó skárra þó Heimir sé sofandi við hliðina á mér, ég get þá skriðið undir sængina og hjúfrað mig upp að honum svona þegar ónotatilfinningin nær algjörlega tökum á mér  Hef bara ekki oft upplifað svona tilfinningu við lestur einnar bókar, svei mér þá. Ég fer þá bara að glápa á eitthvað í tölvunni þangað til hann kemur heim.

- Það er ekki auðskorið úr því hver er gæfumaður. Oft leynist gæfa í ógæfulíki og ógæfa í gæfulíki.

Sigurður Guðmundsson skólameistari.

Ég tók mig til í dag og pakkaði ÖLLU jólaskrautinu niður. Þ.e.a.s. öllu nema seríunum. Ætlaði nú bara að taka niður jólatréð en svo bara gat ég ekki stoppað! En það verður gaman að taka þetta allt saman upp aftur í desember  Ég ætla hinsvegar að leyfa seríunum að vera uppi þar til í mars eða svo. Nauðsynlegt að lýsa upp skammdegið!

Nú byrjar skólinn í vikunni. Það er staðlota sem ég mæti ekki í. Ég verð í tveimur fögum núna og get ég alveg sagt ykkur að ég nenni ekki að byrja! Skil ekki hverslags leti þetta er eiginlega - en ég hlýt að jafna mig á þessu

Við tókum okkur rúnt inn í Fannardal í dag. Tók þessa mynd af trjánum inn í Bakkasel. Svo vetrarlegt og óskaplega fallegt finnst mér. Trén svo þung af snjónum.

Er að spá í að byrja aftur með gullkorn dagsins. Hvernig líst ykkur á það? Ég hef svo gaman að svoleiðis. Hér kemur það fyrsta.

- Maðurinn er aldrei stærri en þegar hann krýpur.

Blaise Pascal

Í næstu viku ætlum við mamma upp í Egilsstaði að láta gelda köttinn. Blessaður karlinn. Ætli þetta verði ekki líka verslunarferð hjá okkur - finnst það líklegt, kíkja á útsölur og svona.

Bókin hennar Yrsu - Auðnin, heldur mér alveg í heljargreipum. Finnst hún svo spúkí eitthvað og draugaleg. Mér líður meira að segja hálf ónotalega þegar ég fer að sofa á kvöldin - alveg satt. Held að þessi bók sé ekki fyrir myrkfælnar manneskjur.

Er enn að bíða eftir að einkunnin fyrir prófið detti inn. Þeir taka sér alveg tímann í þetta blessaðir. En hún hlýtur að fara að koma, í síðasta lagi á mánudaginn.

Ætla að fara að prjóna og horfa á unglingaseríuna 90210. Datt inn í hana um daginn. Algjör snilld!  Nokkrir leikararnir úr Beverly Hills þáttunum eruí þessari seríu. Ferlega skemmtilegt.