Gleðilega páska

... öllsömul. Páskarnir hér hjá okkur hafa einkennst af inniveru og bólum! Já Heimir var svo "heppinn" að ná sér í hlaupabóluna af dóttur sinni. Þetta er bara ógeðslegt í einu orði sagt. Óska engri fullorðni manneskju þetta. Annars er Ingibjörg orðin nokkuð hress, hitalaus og allar bólur orðnar þurrar, bara svona hrúður/sár eftir á verstu stöðum. Hún fékk bóluna ekki vægt eins og ég hélt að yrði og fór hún verst út úr þessu á andliti, höfuðleðrinu og baki. Ég fékk algjört áfall þegar ég kom heim úr borginni á miðvikudagskvöldið og sá þau feðginin. Heimir búinn að vera hundlasinn og er það eiginlega enn. Allur í bólum og klæjar stanslaust. Ekki skemmtilegt semsagt! Ég er hinsvegar hin hressasta (svona fyrir utan geðheilsuna  ) og er svo heppin að vera búin að fá hlaupabóluna sem krakki, svo það var ekkert að óttast. Finnst ágætt að Ingibjörg sé búin með þetta áður en barnið kemur.

Nóg er af páskaeggjunum hér á bæ. Ingibjörg opnaði tvö í morgun og nartaði í innvolsið. Hún er nú mest spennt fyrir því, og svo páskaungunum. Ég opnaði eitt og þá eigum við 4 egg eftir og þar af 2 númer 6! Það verða því til egg hér frameftir sumri grunar mig. Fengum eitt Góu egg og eitt Freyju egg, erum hvorugt búin að opna, en rest var svo Nói. Alltaf finnst mér hann nú góður, en það verður gaman að smakka hin svona til tilbreytingar.

Annars var gaman í Reykjavíkinni. Ég náði að gera flest af því sem ég ætlaði mér á þessum litla tíma sem ég hafði aflögu. Var mikið í skólanum og gekk vel með öll þau verkefni sem ég þurfti að flytja. Ég fór auðvitað á Quiznos (2x), við Heiða fórum á Ruby Tuesday og í ísbúðina á Hagamel/Melhaga. Við Sigurlaug náðum svo að eyða tíma saman á þriðjudeginum og gátum afrekað ýmislegt á tveimur klukkutímum! Meðal annars kíktum við örstutt í Smáralindina og svo í Ikea. Fórum svo og átum á Pítunni. Jammí! Langt síðan við höfðum farið þangað, svakalega góðar píturnar þarna maður lifandi! Ég hefði átt að taka eina auka með og færa þeim í Egilsbúð  

Ég er enn að fikra mig áfram í litavalinu á síðunni. Þið afsakið þetta "rask"  Hugsa að ég láti staðar numið í bili. Er nokkuð sátt við þennan skæra bleika lit. Kannski ég hringli eitthvað í hinum litunum, var eitthvað að vesenast með fjólubláa litinn.

En jæja, ég er komin upp í rúm. Ætla að horfa á eins og einn Brothers & sisters og prjóna fyrir svefninn. Eigi þið ánægjulegan annan í páskum.

Á leiðinni suður

Allt klappað og klárt fyrir suðurferð. Enda aðeins hálftími í að ég leggi í hann uppeftir. Mér til "mikillar gleði" held ég að barnið sé komið með hlaupabóluna!! Auðvitað stílað inn á það fyrir mig. Hún er alla vegna með nokkrar bólur á líkamanum, svo ég reikna nú með að þetta sé bólan. Hún er ekki vön að vera bólótt! Vonandi verður hún bara svona góð og þetta verður ekki svæsið. Hún er allavega ekkert veik núna svo það er huggun... auðveldara að fara.

Ég lofaði ykkur kjúklingauppskriftinni. Ofur einfalt og svaaakalega gott:

Það er hægt að nota heilan tilbúinn kjúkling en ég steiki frekar bringur og sker þær niður. 500 gr kotasæla og 1 og hálf krukka taco sósa (mild, medium eða hot - allt eftir behag), blandað saman í skál og smurt á mjúkar tacopönnukökur. Setja kjúklinginn ofan á og rúlla upp kökunum. Setjið kökurnar hlið við hlið í smurt form, strá osti yfir og inn í ofn í ca. 20-30 mín. Gott að borða með þessu salat, avocado og sýrðan rjóma.

Þar sem ég er soddans sósukerling, þá nota ég meiri kotasælu og meiri taco sósu. Setti núna síðast smá rauðlauk í kökurnar, voða gott

Var að setja inn nýjar myndir á barnalandið, meðal annars tveimur bumbumyndum breytti í leiðinni lykilorðinu, þið mailið bara á mig ef þið viljið passwordið.

En já, er að hugsa um að bruna strax á Quiznos þegar ég kem í bæinn... er ekki að grínast! Bless í bili.

JÆJA...

og hvernig líst ykkur nú á breytingarnar?!  Er búin að vera að dúlla mér í þessu í kvöld ásamt því að horfa á Bubba. Finnst ykkur litirnir vera að gera sig eða ekki? Það er sko alveg endalaust hægt að gleyma sér í þessu. Heimir kom mér af stað og þá var bara ekki aftur snúið. Ég var reyndar að spá í svona lime grænum litum, en endaði í þessum. Ég get alltaf breytt. Nú þarf ég gera eitthvað í sambandi við höfuðmyndina sem er ennþá bara blár himinn, veit bara ekki hvað ég ætti að setja þarna. Þarf að fá Heimi í málið... seinna. En vona að þið séuð jafn lukkuleg með breytinguna og ég

Innskot: Minn maður bara búinn að redda höfðinu á blogginu! Þetta kallar maður sko þjónustu! Mér finnst þetta nú voða vinaleg mynd svona yfir veturinn allavegna.

Ég er algjörlega sjúk í pizzur þessa stundina. Ég er 3-svar búin að borða pizzu í dag! Ég byrjaði morguninn á litlu pizzastykki sem hægt er að kaupa niðri í búð (hriiiikalega góð!), kokteilsósu og lítilli kók í gleri!!  I know-I know ekki alveg það hollasta, en ég bara varð! Og best að taka það fram að þetta er í fyrsta skipti sem þetta gerist... svona að morgni til *hóst*. Jæja í dag fórum við mæðgur svo til Guðlaugar og co, fengum þar pizzuafganga og svo í kvöld lagaði ég pizzu handa okkur. Svei mér þá, þetta er gott. En ég er búin að ákveða hvað verður í matinn annaðkvöld, og það verður ekki pizza! Nýr kjúklingaréttur sem ég prófaði um daginn, einfaldur og rosalega góður, skal setja uppskriftina inn á morgun.

Við skulum ekkert vera að tala um Sálartónleikana sem eru akkúrat í þessum skrifuðu orðum. Mig auðvitað DAUÐlangar að vera þar. Ég fer suður á sunnudaginn, hefði auðvitað átt að skella mér suður í dag, en við ræðum þetta bara ekkert frekar!

Skemmtileg comment við síðustu færslu, æði að sjá svona marga nýja! Haldið þessu áfram. Þið "gömlu" megið alveg halda áfram líka sko

Ætla í rúmið að lesa... kveð ykkur í bili, góða nótt.

Ekki lengur ein :)

Ætla að byrja á að segja að mér finnst svaka gaman að sjá 3 nýja "kvittara" við síðustu færslu, endilega verið dugleg að kvitta öllsömul! Fullt af fólki sem skoðar síðuna jafnvel daglega og kvittar aldrei! Ekki nógu gott sko. Spurning að fara að læsa síðunni bara, það er svolítið sniðugt finnst mér. Já Kalli, ég ætti kannski að halda pítunámskeið fyrir fólkið í Egilsbúð  Ég veit nú ekki einu sinni hverjir vinna þarna, hverjir kokka né annað, hef bara ekki hugmynd. En þeir mega eiga að pizzurnar eru ÆÐI!

Heimir er kominn heim. Alveg úrvinda eftir borgardvölina. Hringdi í mig í gær til að segja mér hvað hann væri feginn að við hefðum flutt HEIM. Hann var að gefast upp á þessari umferð og því sem er í gangi þarna. Hann er nú verri en ég í þessum málum. Mér finnst alltaf gaman að koma í borgina, þó hraðinn sé mikill.

Það styttist svo í mína ferð. Finnst nú svolítið skrítið að vera að koma suður og vera ekki í Vogunum. En ábúendur þar eru að stinga af til Spánar svo ég verð bara hjá þeim seinna. Það á víst ábyggilega eftir að fara vel um mig hjá Heiðu í Kópavoginum. Engar heimsóknir planaðar, annað en að hitta Sigurlaugu. Hún ætlar með mér í Ikea (alveg rétta manneskan sko) og svo út að borða. Ætlum að gerast svo djarfar og skipta um veitingastað. Sem sagt ekki Fridays, eigum eftir að ákveða stað  Svo er svona ýmislegt sem ég þarf að gera og svo er það auðvitað skólinn. Nóg um að vera í þessari staðlotu og fullt af fyrirkvíðanlegum verkefnum... ojojj. Ætla mér að fara ca. 2-3 á Quiznos, ég bara get ekki beðið!

En jæja, ætli það sé ekki best að koma sér í bælið... ekki ein í þetta skiptið

Pizza og egg

Mamma kom í mat til okkar í kvöld. Gerðum okkur lítið fyrir og pöntuðum okkur pizzu  Mikið svakalega eru pizza67 góðar pizzur, svo ég tali nú ekki um hvítlauksbrauðið! Og já, Egilsbúð er ekki lengur með pítur!! Það leið næstum því yfir mig um daginn þegar ég ætlaði að panta mér kjúklingapítu (ætlaði að gefa þeim einn séns enn). En nei engar pítur á boðstólnum! Hvað er það?!? Ég meina, pítur eru ekki flóknar... þegar þær eru rétt gerðar!

Er búin með fyrsta páskaeggið þetta árið. (Fyrsta af mörgum!) Mamma kom með það í eftirmat  Svona lítið egg í álpappír, bara gott. Svo fyrsti páskamálsháttur ársins er:

Það er til lítils að hlaupa ef stefnt er í skakka átt.

Þá er ég búin að horfa á Kompás þáttinn og búin að gráta úr mér augun. Alveg er þetta hræðilegt, óskaplega finn ég til með þessu fólki og rosalega er skrítið að maðurinn skuli hafa verið látinn laus. Óskiljanlegt!

Jæja ætla upp í rúm að lesa. Er enn að lesa bókina hennar Yrsu. Það er ekki að hún er ekki góð, það er ég sem er eitthvað löt við lesturinn. Góða nótt.

Kjörsvið og afmæli

Ég er farin að hallast á að ég hafi valið mér vitlaust kjörsvið í náminu. Mig reyndar grunaði það þegar ég valdi núna, en ákvað nú samt að velja samfélagsgreinarnar. Reyndar finnst mér þessi breyting á náminu alveg útí hött, að velja kjörsviðið svona snemma. Sérstaklega þegar maður er ekki viss. Nú er ég virkilega að spá í að skipta yfir í íslenskuna sem kjörsvið. Ætla að tala við námsráðgjafann þegar ég fer suður og spjalla um þetta við hana. Sjá hvernig þetta myndi þá raðast hjá mér. Ég yrði örugglega óþolandi íslenskukennari... sífellt að leiðrétta fólk! Ég er reyndar svoleiðis nú þegar og hef alltaf verið. En ég ræð bara ekki við mig og áður en ég veit af hrekkur leiðréttingin bara útúr mér. Það eru bara sum orð sem gjörsamlega stinga í eyrun, eins og tengur (ojj ég get varla skrifað þetta), einkanir og fleiri orð sem eru beygð vitlaus.

Annars á Sálin afmæli í dag! Tvítugir takk fyrir. Það þýðir að ég var 11 ára þegar þeir byrjuðu að spila og ætli ég hafi ekki fallið fyrir þeim þegar ég var 12 eða 13. Man eftir fyrstu tónleikunum sem ég fór á í Egilsbúð. Hef þá verið á þessum aldri og þeir voru með dagtónleika fyrir þennan aldurshóp. Eftir tónleikana fengum við eiginhandaráritun hjá Stebba og Gumma, og þá var bara ekki aftur snúið! Hef DÁÐ þá síðan. Ófá böllin sem ég hef farið á, og á tímabili þegar ég bjó fyrir sunnan fór ég á ÖLL böllin... ÖLL! Guð hvað þetta var gaman Sálin er og verður einfaldlega besta hljómsveit ever! Punktur. Hlakka til næsta Sálarballs... hvenær sem það nú verður

Við Ingibjörg þrífumst bara ágætlega þennan fyrsta dag í einverunni. Enda átti ég svo sem ekki von á öðru.

Þar sem myndirnar við síðustu færslu vöktu lukku (og heimþrá) set ég þessa hér líka sem ég tók út fjörðinn.

Það er svo lítið mál fyrir mig að taka mynd á hverjum degi út um gluggann fyrir ykkur, ef þið viljið

Sunnudagur

Enn ein helgin liðin, rosalega líður tíminn hratt! Sem betur fer varð ekkert meira úr veikindum hjá Ingibjörgu, hún var bara heima á mánudeginum og fór svo í leikskólann. Ég hins vegar bíð hreinlega eftir hlaupabólunni, það yrðu undur og stórmerki ef hún slyppi, en maður veit aldrei. Bæði kostir og gallar ef hún fengi bóluna núna. Mér þætti t.d. hræðilegt ef hún fengi hana þegar ég væri í Reykjavík, ég kæmi sennilega bara heim. En svo er spurning hvort ekki væri bara best að klára þetta af áður en hún verður eldri. En þetta kemur allt í ljós.

Heimir er að fara suður á morgun og verður fram á fimmtudag. Við mæðgur því einar heima hér í fyrsta skipti... spurning um að flytja sig yfir í Gauksmýrina á meðan  Nei ætli það, mér finnst nú alltaf voða gott að vera ein í smá tíma, það breytist ekkert. Ég fer svo suður á sunnudag eftir viku.

Núna er ég að prjóna leikskólapeysu á dömuna. Ég er hinsvegar alltaf að velta fyrir mér hvort ég eigi að ruslast til að klára skírnarkjólinn sem ég byrjaði einu sinni á. Ég set það bara svo fyrir mig að ég veit ekkert hvernig ég vil hafa hann að ofan, af því ég er ekki með neina uppskrift. Það væri samt svo æðislegt að geta skírt barnið/börnin sitt/sín í kjól sem maður gerði sjálfur. Eða það finnst mér. Sé eftir að hafa ekki klárað hann áður en Ingibjörg var skírð, svo ætli ég myndi ekki sjá tvöfalt meira eftir því ef þetta barn yrði ekki heldur skírt í honum. Hugsa það.

Ég er alveg heilluð af útsýninu sem við höfum hérna á Nesbakka 7. Ég get alveg gleymt mér við að horfa út á fjörðinn. Ég verð góð í fæðingarorlofinu, sé það fyrir mér, þá sit ég hér við gluggann og flygist með skipaumferð, veit alltaf hver er að koma í land og hvernig hefur fiskast  Gáfuleg!

Set hér inn myndir sem ég tók í vikunni, gamlir norðfirðingar geta yljað sér við þær

Já hér er sko fallegt! 

Veikindi og fleira

Ingibjörg er orðin lasin. Það hlaut að koma að því. Hún er búin að vera í leikskólanum í tvær vikur og þar gengur hlaupabólan ásamt fleiri pestum. Reyndar er hún ekki komin með neinar bólur ennþá... er bara með hita. Og kannski verður þetta ekkert meira í þetta skiptið. Heimir verður heima á morgun og ég fer í vinnuna.

Í netleysinu steingleymdi ég að tjá mig um Eurovision. Ég er nú nokkuð sátt við úrslitin. Reyndar fannst mér Hey hey hó hó ferlega skemmtilegt og hefði alveg verið til í að það færi út. Fyrir utan það að mér fannst stelpan skemma lagið en strákarnir voru bara flottir  Ég er ógurlega hrifin af Friðriki Ómari, finnst hann óskaplega myndarlegur drengur, sætur og glaðlegur. Ég þoli hinsvegar stúlkuna ekki jafnvel, en hún syngur vel. Þau eiga eftir að verða okkur til sóma, þó við vinnum þetta kannski ekki

Styttist í suðurferð hjá mér. Og já styttist alla svakalega í páskana!! En ég fer suður að kvöldi 16. mars og kem heim að kvöldi 19. Er búin að panta mér tíma í klippingu hjá Önnu Kristínu, svo ég verð ægilega fín þegar ég kem heim  það verða sko komnir 3 mánuðir þá síðan síðast!

Er að horfa á Kaldaljós með öðru. Alveg mögnuð mynd. Þau systkinin eru frábær. Svo ekki sé nú talað um föðurinn, hann er sennilega einn besti leikarinn sem við eigum og höfum átt.

Set inn eina mynd í lokin af Ingibjörgu úr íþróttaskólanum. Það var svo gaman!

Trúið þið þessu?

Ég er orðin nettengd!! Ég þurfti ekki að grípa til þessara ráða sem Þórey ráðlagði mér, en trúið mér, ef hann Grétar hefði ekki hringt í mig í gær og tilkynnt mér að ég væri orðin tengd, þá hefði ég sennilega hringt í þá og farið að skæla. En máttur "ljóta" orðsins er greinilega mikill og hef ég ákveðið að nota það í neyð... svona þegar allt annað virðist útilokað.

Annars erum við skötuhjú ein í kvöld. Ingibjörg dvelur hjá ömmu sinni í góðu yfirlæti fram á morgun. Þær nöfnur fóru inn í hesthús að gefa hestunum brauð og pönnukökur. Það endaði reyndar með því að Ingibjörg fór á hestbak með einum hestamanninum. Var víst alveg í skýjunum  Það verður gaman að hitta hana á morgun og heyra lýsingarnar.

Við fórum í íþróttaskólann í morgun. Ægilega gaman. Ingibjörg er reyndar svo lofthrædd að hún var nú ekki mikið að príla, svona fyrir utan hvað hún er varkár. En ætli hún verði ekki aðeins kaldari næsta laugardag. Hugsa það. Henni fannst samt þetta samt mikið sport og hljóp og gerði það sem henni þykir skemmtilegt. Var svo ekkert á því að fara heim. Eysteinn er með þessa tíma og þegar hann byrjaði í morgun að tala um hvað ætti að gera og svona, fékk ég algjört flashback og fannst ég vera 12 ára í leikfimi  en hann kenndi mér einmitt leikfimi í nokkur ár. Ferlega fyndið.

Annars eru allir bara nokkuð hressir. Mér finnst svona fullmikill vetur búinn að vera núna. Loksins þegar mestur snjórinn var farinn og götur orðnar auðar þurfti að snjóa aftur. Og það er sko bara nokkuð mikill snjór í bænum. En það er ljúft að eiga bílskúr og geta farið í heitan bílinn á morgnanna, svo ég tali nú ekki um að sleppa við að skafa bílinn

Akkúrat ekkert í sjónvarpinu, svo ég er að hugsa um að rifja aðeins upp Nágranna í tölvunni. Langt síðan ég hef horft á þessar elskur. Góða nótt.

Brjál!!

Ég er orðin svo pirruð yfir þessu netleysi að ég get varla lýst því! Ég er búin að vera svo pollróleg allan þennan tíma en nú er hinsvegar eitthvað farið að gjósa inni í mér. Ég er semsagt komin í málið (búin að taka það úr höndunum á Heimi) og er búin að vera í beinu sambandi við þá félaga mína í Vodafone, þá Grétar og Garðar. Bæði í gær og í dag. Ég held þeir séu aðeins farnir að hræðast mig, ég er samt ekki farin að láta neitt verulega illa. Guð hjálpi þeim ef það gerist! Heimir fræddi mig nefnilega á því að ég væri svolítið agressív á þessari meðgöngu minni. Svo þeir G og G eiga ekki von á góðu ef ég hleypi öllu frá mér, skal ég ykkur segja. Ég hreinlega skil ekki þennan andskotans drulluhátt, því það er ekki eins og það þurfi að koma maður heim til okkar og vinna í marga klukkutíma. Er nýbúin að segja skilið við Garðar í símann, og hann ætlar enn og aftur að senda beiðni um að þetta verði sett í forgang, og sagðist hann ekki trúa öðru en að þetta kæmi inn í dag! (Yeah right). Þetta er jú tíundi virki dagurinn sem þetta er búið að vera í vinnslu.  Og bara til að þið gerið ykkur grein fyrir því hvað ég er brjáluð þá ætla ég að segja/skrifa hér eitt orð sem Þórey hefur mikið dálæti á og ég hef sagt að ég gæti aldrei sagt/skrifað!! Ég ætla rétt að vona að þeir TUSSIST til að koma þessu í lag fyrir helgi!!

Mig langar ekki að segja ykkur neitt annað, það sýður bara svo á mér og þetta NET MÁL á orðið hug minn allann!!